हिंदू प्रकाशवार्ता प्रतिनिधी
छत्रपती संभाजीनगर / पंढरपूर
महाराष्ट्र संस्कृतीचा महामेळा असलेल्या पवित्र आषाढी एकादशीच्या मुहूर्तावर ‘सेवापथ सोशल फाउंडेशन’ एनजीओच्या वतीने पंढरपूर येथे विठ्ठल दर्शनासाठी आलेल्या लाखो वारकऱ्यांसाठी उपक्रमाचे आयोजन करण्यात आले होते. वारीच्या वाटेवर चालणाऱ्या आणि पंढरपुरात पोहोचलेल्या भाविकांसाठी संस्थेच्या वतीने मोफत फराळाची भव्य व्यवस्था करण्यात आली होती. ‘मानवसेवा हीच खरी ईश्वरसेवा’ हा उदात्त हेतू समोर ठेवून हा उपक्रम राबवण्यात आला. निमित्त धार्मिक असले, तरी या माध्यमातून राष्ट्रीय सद्भावना आणि एकात्मतेचे एक उत्तम दर्शन घडल्याचे पाहायला मिळाले. सेवापथ सोशल फाउंडेशनच्या या उपक्रमास परिवारातील सर्व सदस्यांचे, हितचिंतकांचे तसेच नागरिकांचे सहकार्य लाभले. या सर्वांच्या बळावरच हा सेवायज्ञ यशस्वीपणे पार पडला. विविध क्षेत्रांतील मंडळींनी एकत्र येत या उपक्रमात सहभाग नोंदवला, ज्यामुळे धार्मिक सलोख्यासोबतच मानवी मूल्यांचे दर्शन घडले. फराळ वाटपादरम्यान संपूर्ण परिसरात “॥ विठ्ठल विठ्ठल जय हरी विठ्ठल ॥” असा जयघोष सुरू होता, ज्यामुळे वातावरण अत्यंत भक्तीमय आणि सकारात्मक झाले होते. ”पांडुरंगाच्या कृपेने आपल्या सर्वांच्या जीवनात सुख, शांती, समृद्धी, उत्तम आरोग्य आणि आनंद नांदो. विठुरायाच्या नामस्मरणाने प्रत्येकाचे जीवन भक्ती, प्रेम आणि सकारात्मक ऊर्जेने उजळून निघो.” अशी भावना सेवापथ सोशल फाउंडेशन परिवाराने व्यक्त केली आहे. संस्थेच्या या स्तुत्य उपक्रमाबद्दल सर्वच स्तरातून कौतुक होत असून, भविष्यातही असेच समाजोपयोगी कार्य चालू ठेवण्याचा संकल्प सेवापथ परिवाराने केला आहे. या संपूर्ण सेवाकार्यात प्रत्यक्ष व अप्रत्यक्ष मदत करणाऱ्या सर्व सहकाऱ्यांचे संस्थेच्या वतीने मनःपूर्वक आभार मानण्यात आले आहेत.
