दैनिक हिंदू प्रकाश वार्ता
खुलताबाद प्रतिनिधी संतोष करपे..श्री क्षेत्र वेरूळच गो शाळेतील १३५ गाईंना पावसाअभावी चाऱ्याची भीषण टंचाई; मुक्या जनावरांचे प्राण वाचविण्यासाठी चारा, कुट्टी व भुसा दान करण्याचे
आवाहन यावर्षी पावसाचे प्रमाण अत्यंत कमी झाल्याने राज्यात चाऱ्याची भीषण टंचाई निर्माण झाली आहे. याचा फटका वेरूळ तालुका खुलताबाद जिल्हा छत्रपती संभाजी नगर येथील श्री पार्श्वनाथ आश्रम, गुरुकुल आचार्य विद्यासागर गोशाळेलाही बसला आहे. या गोशाळेत सध्या सुमारे १३५ गायी असून, त्यांच्यासाठी पुरेसा चारा उपलब्ध होत नसल्याने मोठे संकट निर्माण झाले आहे. या मुक्या जनावरांचे प्राण वाचविण्यासाठी दानशूर व्यक्तींनी पुढाकार घेऊन चारा, कुट्टी व भुसा दान करावे, असे भावनिक आवाहन संस्थेचे सचिव डॉ. प्रेमचंद पाटणी यांनी केले आहे.
वेरूळ येथील या गोशाळेत सुमारे १३५ गायींचा सांभाळ केला जातो. त्यापैकी केवळ चार गायी दूध देणाऱ्या असून, उर्वरित सुमारे १३१ गायी दूध न देणाऱ्या आहेत. पावसाअभावी परिसरातील डोंगर-दऱ्यांमध्ये जनावरांसाठी चारा उपलब्ध होणे कठीण झाले आहे. त्यामुळे गोशाळेतील गायींच्या चाऱ्याचा प्रश्न गंभीर बनला आहे. पुरेशा चाऱ्याअभावी गायींची उपासमार होत असून, त्यांच्या आरोग्यावरही विपरीत परिणाम होत आहे. पाण्याची व्यवस्था केली; मात्र चाऱ्याचा प्रश्न कायम
गोशाळेतील गायींना पिण्यासाठी पाणी उपलब्ध व्हावे, यासाठी संस्थेने किमान दोन किलोमीटरपर्यंत खोदकाम करून पाण्याची व्यवस्था केली आहे. मात्र, पाण्याची व्यवस्था झाली असली, तरी चाऱ्याअभावी गायींच्या संगोपनाचा प्रश्न कायम आहे. जनावरांना पुरेसे खाद्य मिळत नसल्याने त्यांची अवस्था बिकट होत चालली आहे. अशा परिस्थितीत गायींचे संरक्षण आणि संगोपन करण्यासाठी समाजातील दानशूर व्यक्तींच्या मदतीची नितांत गरज आहे. चारा दान करून मुक्या जनावरांना द्या जीवदान
गोशाळेतील गायींची उपासमार थांबविण्यासाठी शेतकरी, व्यापारी, सामाजिक संस्था, सेवाभावी संघटना आणि दानशूर नागरिकांनी आपल्या परीने मदत करावी. उपलब्ध असलेला हिरवा किंवा सुका चारा, कुट्टी तसेच भुसा दान करून या मुक्या जनावरांचे प्राण वाचविण्यास हातभार लावावा. संकटाच्या या काळात समाजाने पुढे येऊन गोशाळेला मदत केल्यास गायींच्या चाऱ्याचा प्रश्न काही प्रमाणात मार्गी लागू शकतो.
चारा दान करू इच्छिणाऱ्या दानशूर व्यक्तींनी संस्थेचे सचिव डॉ. प्रेमचंद पाटणी यांच्याशी संपर्क साधावा असे आवाहन केले आहे.
