क्षणिक मौजेतून अपघाताचा धोका, वाहतूक शिस्त व पालकांच्या जबाबदारीचा प्रश्न ऐरणीवर
प्रतिनिधी सिद्धेश्वर थोर
छत्रपती संभाजीनगर : शहरातील सिडको ते जय भवानीनगर मार्गावर विद्यार्थ्यांच्या बेफिकीर वर्तनाचा एक धोकादायक प्रकार समोर आला आहे. चालत्या स्कुटीवरून एका विद्यार्थ्याने सायकलस्वाराला पायाने ढकलत पुढे नेल्याचे दृश्य कॅमेऱ्यात कैद झाले असून, या प्रकारामुळे वाहतूक सुरक्षेचा प्रश्न पुन्हा एकदा ऐरणीवर आला आहे.
वर्दळीच्या रस्त्यावर घडलेल्या या घटनेत स्कुटीवरील विद्यार्थी सायकलस्वाराला पायाचा आधार देत पुढे नेत असल्याचे दिसून येते. प्रथमदर्शनी हा प्रकार केवळ मौजमजा वाटत असला तरी त्यातून गंभीर अपघात घडण्याची शक्यता होती. सायकलस्वाराचा तोल गेला असता किंवा अचानक एखादे वाहन समोर आले असते तर मोठी दुर्घटना घडू शकली असती.
शहरात विद्यार्थ्यांकडून वाहतूक नियमांकडे दुर्लक्ष होण्याच्या घटनांमध्ये वाढ होत असल्याचे चित्र आहे. हेल्मेटचा वापर टाळणे, ट्रिपल सीट प्रवास करणे, भरधाव वाहन चालविणे यासारख्या प्रकारांबरोबरच आता अशा धोकादायक कृतीही समोर येत आहेत. त्यामुळे वाहतूक नियमांचे पालन आणि रस्ते सुरक्षेबाबत जनजागृतीची आवश्यकता अधिक तीव्र झाली आहे.
नागरिकांच्या मते, विद्यार्थ्यांमध्ये वाहतूक शिस्तीची जाणीव निर्माण करण्याबरोबरच पालकांनीही मुलांच्या वाहन वापरावर लक्ष ठेवणे गरजेचे आहे. रस्त्यावर सुरक्षित वर्तनाबाबत मार्गदर्शन केल्यास अशा प्रकारांना आळा बसू शकतो.
दरम्यान, वाहतूक पोलिसांनी अशा प्रकारांकडे गांभीर्याने लक्ष देऊन नियमांचे उल्लंघन करणाऱ्यांवर कारवाई करावी.
