हिंदू प्रकाशवार्ता | जाकेर बेग
अंधारी दि. १८ जून – उन्हाळ्याच्या हंगामात गावरान आंब्यांची बाजारपेठ पुन्हा एकदा गजबजली असून ग्राहकांकडून या आंब्यांना मोठी मागणी होत आहे. नैसर्गिक चव, सुगंध आणि पारंपरिक वैशिष्ट्यांमुळे गावरान आंबे ग्राहकांच्या पसंतीस उतरले आहेत. परिणामी शेतकऱ्यांना चांगला दर मिळत असून आर्थिक लाभही वाढला आहे. यंदा हवामान अनुकूल राहिल्यामुळे अनेक भागांत गावरान आंब्यांचे उत्पादन समाधानकारक झाले आहे. स्थानिक बाजारपेठांमध्ये तसेच रस्त्याच्या कडेला उभारलेल्या विक्री केंद्रांवर ग्राहकांची मोठी गर्दी पाहायला मिळत आहे. रासायनिक प्रक्रियेविना नैसर्गिकरीत्या पिकवलेल्या आंब्यांना विशेष मागणी असल्याचे शेषराव तायडे व आबेद सय्यद ह्या विक्रेत्यांनी सांगितले. शेतकरी सांगतात की, गावरान आंब्यांच्या विविध जातींना ग्राहकांकडून चांगला प्रतिसाद मिळत असून दरही समाधानकारक आहेत. त्यामुळे ग्रामीण भागातील अनेक कुटुंबांना या हंगामातून अतिरिक्त उत्पन्न मिळत आहे. दुसरीकडे, बाजारात उपलब्ध होणाऱ्या कृत्रिमरीत्या पिकवलेल्या फळांच्या तुलनेत गावरान आंब्यांची गुणवत्ता अधिक असल्याने ग्राहक त्यांना प्राधान्य देत आहेत.
